Lidhur me pamjen e re që Tirana ka marrë dhe ndryshimi që ka pësuar është i dukshë, Dhoma e Tregtisë dhe Industrisë Tiranë, i ka akorduar kryebashkiakut Veliaj çmimin special “Administratori më i mirë i vitit 2017”.
Vlerësim ky që vjen edhe si një mirënjohje që komuniteti i biznesit ka ndaj kryetarit të Bashkisë së Tiranës, pasi administrimi i mirë i qytetit sjellë edhe një klimë më të mirë për të bërë biznes në Tiranë.
Veliaj u shpreh se ndihej i vlerësuar dhe njëkohësisht edhe më i motivuar për t’i shërbyer qytetit.
“Unë nuk besoj se ka çmim më të madh se sa të kesh privilegjin që t’i shërbesh këtij qyteti, qytetit ku unë jam rritur, ku ju bëni biznes, ku ne të gjithë kemi lidhur jetët tona. Dua t’ju falenderoj për një çmim që në fakt ma jepni çdo ditë, që është mbështetja, ndonjëherë edhe e heshtur. E di që me shumë prej jush kemi debate, sforcohemi, bëjmë gjëra të bukura, mërzitemi, por ndonjëherë ndodh ndonjë emergjencë natyrore, por ndonjëherë ndonjë s’ka paguar taksa, megjithatë, e gjitha kjo i ngjan një familje të madhe. A ka një familje ku çdo gjë shkon vaj? Ne debatojmë, diskutojmë, përpiqemi, sforcohemi, ama në fund çdo gjë përfundon mirë. Në fund të këtij viti, dua të them se çfarëdo që ka ndodhur në këtë qytet ka përfunduar mirë. Puna juaj është ajo që punëson njerëz, ajo që mban ekonominë e këtij vendi gjallë. Nëse ekonomia rritet me 3-4-5 për qind, vjen nga ju dhe gjithë kontributi juaj”, tha kryetari i Bashkisë së Tiranës, Erion Veliaj.
