Këshilli i Ministrave ka akorduar miratimin e një fondi prej 1.2 miliardë lekësh, për mbështetjen e fermerëve. Vendimi është bërë me dije nga ministrja e Bujqësisë, Frida Krifca e cila sqaroi se ky bonus për fermerët vjen në një kohë që lufta në Ukrainë dhe bllokimi i eksportit të grurit ka krijuar vështirësi në botë. Krifca thekson se çdo fermer që do të mbjellë një hektarë me grurë, për çdo hektarë do të marrë bonus 30 mijë lekë të reja.
“Kemi miratuar një fond prej 1.2 miliardë lekë, që i shtohet buxhetit të skemës Kombëtare të këtij viti, duke e çuar në 4.9 miliardë lekë, buxheti më i madh i vënë ndonjëherë në dispozicion.
E shtymë më tej këtë gamë sepse duam t’i vijmë në ndihmë të gjithë fermerëve për uljen e kostos së prodhimit.
Kemi pasur një sezon mjaft të mbarë të prodhimit të grurit, gati historik, hambarët janë mbushur plot, gjithsesi duke parë dhe fenomenet në botë, për të rritur pavarësinë tonë ushqimore në aspektin e prodhimit të grurit, kemi menduar të fusim një masë të posaçme, ku për fermerët që prodhojnë mbi një hektarë grurë do marrin 30 mijë lekë të reja mbështetje për hektarë”, u shpreh ajo.
