Koçijançiç: Rregullat e BE për përdorimin e parave, shumë të ashpra
Bashkimi Evropian ka siguruar 50 milionë euro ndihmë për Maqedoninë për ballafaqimin me krizën e emigrantëve, ka thënë për AlsatM zëdhënësja e Komisionit Evropian, Maja Koçijançiç. Por, në deklaratën me shkrim thuhet se rregullat sipas të cilave Komisioni Evropian transferon para për këtë qëllim janë shumë të ashpra. “Një çështje e rëndësishme për të cilën autoritetet duhet të jenë të vetëdijshëm është se rregullat rreth asaj se si ne i përdorim paratë e taksapaguesve janë shumë të ashpra. Ne paratë e Bashkimit Evropian nuk i transferojmë direkt në llogaritë e qeverive, por i paguajmë sipas qëllimit, mbështesim apo financojmë logjistikë ose aktivitete bazuar në nevojat e identifikuara”, ka thënë Koçijançiç.
Në deklaratën me shkrim gjithashtu thuhet se që nga fillimi i krizës së refugjatëve Komisioni Evropian deri më tani ka ndarë 16 milionë euro për Maqedoninë, për përmirësimin e sistemeve të menaxhimit të kufirit dhe gjendjes së emigrantëve.
