Alaudin Malaj bën kërkesë zyrtare për ministrin Manjani
Alaudin Malaj kërkon përjashtimin e Gjin Gjonit nga votimi për kryetarin e Gjykatës së Apelit në Tiranë. Kërkesa është bërë me anë të një shkrese zyrtare që kreu aktual i Gjykatës së Apelit i ka drejtuar ministrit të Drejtësisë Ylli Manjani. Sipas Malajt, marrja pjesë e Gjin Gjonit në këtë proces përbën konflikt të hapur interesi. “Prandaj, kërkoj që ky anëtar i Këshillit të Lartë të Drejtësisë të mos marrë pjesë në asnjë fazë të proçesit të vlerësimit dhe përzgjedhjes së kandidaturave për postin drejtues të kësaj gjykate, pasi gjendet në kushtet e pengesës ligjore dhe konfliktit të hapur të interesit. Përjashtimi i tij nga ky proçes, duhet të bëhet për të hequr çdo dyshim për njëanshmëri në lidhje me ecurinë e procesit të vlerësimit të kandidaturës sime, me qëllim që ky proçes të jetë sa më transparent, i drejtë dhe për të respektuar garancitë maksimale proçedurale”, thuhet në kërkesë. Mbledhja do të zhvillohet ditën e hënë dhe zgjedhja e kryetarit të Apelit është një nga pikat e rëndësishme e rendit të ditës.
Për këtë post kandidojnë dhe gjyqtarët Hysni Demiraj dhe Gramoz Levanaj.
