Huaja për bujqësinë është në nivele shumë të ulta
Pothuajse të gjithë bankat tregtare të vendit tonë e kanë të përqëndruar dhënin e kredisë në vetëm pak sektorë të ekonomisë. Ky është përfundimi i nxjerrë nga një studim i ekspertëve të Bankës së Shqipërisë. Sipas studimit në fjalë diversifikimi i ulët i sektorit bankar shqiptar e ekspozon sektorin ndaj goditjeve të mundshme, të cilat mund të cënojnë qëndrueshmërinë financiare. Sektori në të cilin është përqendruar më shumë kredidhënia e bankave është sektori i tregtisë, riparimit të automjeteve dhe artikujve shtëpiakë me rreth 23.4 për qind të totalit të sektorit bankar. Janë po këto sektorë: tregtia, ndërtimi dhe kredia konsumatore njëkohësisht edhe më të ekspozuarit ndaj rrezikut të kredisë. Këta sektorë rezultojnë me një nivel të lartë të raportit të kredive me probleme, thuhet në studim. Ndërkohë sektorë të tillë si prodhimi, e vecanërisht byjqësia, që zënë mbi 20 për qind të prodhimit kombëtar kanë portofolin më të ulët të kredisë, packa se kanë kontribuar pozitivisht në rritjen ekonomike dhe atë të eksporteve. Por ajo që bie në sy është se këta sektorë në vitet e fundit po bëhen tërheqës për orientimin drejt tyre të investimeve të sektorit bankar. Ndër këta sektorë përmendim: sektori i industrisë nxjerrëse, prodhimit dhe shpërndarjes së energjisë elektrike, ndërtimit, transportit dhe bujqësisë.
Roli ndërmjetësues i sektorit bankar shqiptar u bë më i dukshëm pas vitit 2004, ndërkohë që shënoi kulmet e veta në vitet 2004-2008. Në vitet e fundit kreditimi ka qenë në rënie, duke kulmuar me vlera negative rritjeje në korrik 2013-korrik 2014 kryesisht si rezultat i ngadalësimit ekonomik dhe rritjes së kredive me probleme.
