Bankat: Edhe kredimarrësit e mirë janë në vështirësi
Kreditë me probleme kanë pësuar një rritje të lehtë duke shkuar në 18.4% të totalit në fund të muajit janar. Rritja me 0.2 pikë përqindjeje krahasuar me një muaj më parë është raportuar në statistikat e Shoqatës së Bankave, ku specifikohet se kjo rritje ka ardhur për dy arsye. Së pari, si rrjedhojë e rënies së stokut të huasë në total, që ka zbritur nga 582 miliardë lekë në dhjetor në 580 miliardë lekë në janar dhe së dyti, është shënuar një rritje e huave me 91 deri në 180 ditë vonesë, që është kategoria e parë kur huaja fillon e bëhet problematike. Kjo lloj kredie ka shkuar nga 24.7 në 25.7 miliardë lekë.
Kredia standarde me deri 30 ditë vonesë që zë 74 për qind të totalit të huasë në janar të këtij viti ka patur rritje duke treguar se dhe kredimarrësit e mirë tashmë janë në vështirësi. Në dhjetor, huatë me probleme zbritën ndjeshëm në rreth 18%, duke u ulur për herë të parë pas mëse dy vitesh nën 20%, kryesisht si rrjedhojë e fillimit të ristrukturimit të korporatave të mëdha dhe fshirjes së kredive të humbura. Në 2015-n, sipas Bankës së Shqipërisë, treguesi i kredive të humbura me mbi një vit vonesë dhe pa shpresë arkëtimi u ul me rreth 100 milionë euro. Që prej dy vitesh Banka e Shqiperisë ka nisur nga zbatimi i një plani masash për uljen e kredive në probleme, që parashikon 13 ndërhyrje në legjislacion. Deri në fund të shtatorit të vitit 2016, do të paraqiten në Parlament ndryshimet e Kodit të Procedurës Civile dhe Ligji për përmbaruesit private , me të cilat synohet rritja e efikasitetit të proceseve gjyqësor dhe mbledhjes me forcë të detyrimeve.
