Komisioni Qëndror i Zgjedhjeve njofton se nesër në datë 27 korrik, ora 10.00 është thirrur mbledhja e radhës e këtij institucioni.
Mësohet se rendi i ditës gjatë mbledhjes do të jetë: Shpallja e rezultatit përfundimtar të zgjedhjeve për organet e qeverisjes vendore të datës 30 qershor 2019.
Nga njoftimi i dhënë nga KQZ kuptohet që mbledhja është thirrur nga nënkryetari Denar Biba dhe tre anëtarët Bledar Skënderi, Edlira Jorgaqi dhe Rezarta Bitri, ndërkohë që në këtë listë thirrjeje nuk gjendet kryetari Klement Zguri.
Kujtojmë se ndryshe nga çdo herë tjetër KQZ-së i janë dashur plot 27 ditë që të ndërmarrë hapin final për shpalljen e rezultatit të zgjedhjeve lokale të 30 qershorit.
