Ismet Beqiri: Fatkeqësisht ky sigurisht është një akt i banditëve
Edhe vetura e shefit të grupit parlamentar të Lidhjes Demokratike të Kosovës, Ismet Beqiri është djegur krejtësisht sot në mëngjes. Këtë për KosovaPress, e ka konfirmuar vetë Beqiri përmes telefonit. Ai, bëri me dije se për rastin është lajmëruar nga fqinjët e tij rreth orës 4 e 30 në mëngjes. Beqiri, thotë të jetë dalë menjëherë poshtë banesës dhe tashmë aty kishin arritur Policia dhe Zjarrfikësit.
Ai, konfirmoi për KosovaPress se dyshimet e para tregojnë se vetura i është djegur me koktej molotovi. Për Beqirin, ky rast por edhe rastet e tjera që kanë ndodhur më herët janë akte banditësh. “Fatkeqësisht ky sigurisht është një akt i banditëve … dhe përkundër kësaj askush nuk mund të na ndalë në punën tonë institucionale për të mirën e vendit dhe nuk është e imja të paragjykoj por vërtet organet e drejtësisë duhet ti zbardhin këto raste sepse nuk është rasti i parë. Qytetarët po shqetësohen sepse po rrezikohet jeta e tyre, se realisht unë banoj në një vend ku ka edhe shumë banorë të tjerë”, tha Beqiri për KosovaPress.
Deri më tani janë djegur edhe vetura e gruas së Ministrit të Bujqësisë Memli Krasniqit, dhe gruas së zëvendësministrit Bajram Gecaj dhe po ashtu është tentuar të digjet edhe vetura e deputetit Adem Grabovcit./KosovaPress/
