Hashim Thaci: Europa e vogël për talentët tanë të mëdhenj
Kosova është tashmë anëtare me të drejta të plota në organizmin më të lartë drejtues të futbollit botëror, FIFA, pasi siguroi 141 vota pro dhe vetëm 23 kundër në Kongresin e 66, që po i zhvillon punimet në Meksiko Siti. Presidenti i FIFA-s Gianni Infantino bëri të ditur rekomandimin e Këshillit të FIFA-s për pranimin e Kosovës. Kreu i Federatës së Futbollit të Kosovës, Fadil Vokrri, në fjalën e tij pasi bëri të ditur se Kosova ishte tashmë e anëtarësuar në Komitetin Olimpik Ndërkombëtar dhe në UEFA, priste me padurim të anëtarësohej edhe në FIFA. Ndërkohë zv.presidenti i Federatës Serbe të Futbollit, ka shprehur rezervat e tij dhe ka bërë fushatë për mospranimin e Kosovës.
Votimi për anëtarësimin e Kosovës rezultoi surprizë, pasi FFK-në e kanë mbështetur 141 vende përkundrejt 23 votave kundër, edhe pse asaj i duheshin vetëm 105 vota për t’u bërë pjesë e FIFA-s. Menjëherë pas anëtarësimit kanë reaguar edhe politikanët e Kosovës. Presidenti Hashim Thaçi ka shkruar në Facebook se, “Europa është shumë e vogël për talentët tanë të mëdhenj”. Edhe kryeministri Isa Mustafa ka uruar sportdashësit përmes një reagimi në Facebook, ndërsa ka premtuar mbështetje nga ana e qeverisë për sportin.
