Policia Rrugore ka ndaluar ditën e sotme në Tiranë, një makinë, tip “BMW”, pasi rezultonte me plot 141 gjoba të papaguara, prej vitit 2020.
Sipas informacioneve, raportohet se shoferi i mjetit, shtetasi me inicialet M.P., ka paguar të gjitha gjobat, që kapnin vlerën afro 2.3 milionë lekë.
Këto gjoba ishin marrë përgjatë vitit 2020-2022, dhe nuk ishin paguar në kohë.
Gjatë fundjavës që lamë pas, makina inteligjente dhe radarët automatikë kanë monitoruar përsëri qarkullimin e automjeteve në Rrugën e Kombit, në të dy senset e lëvizjes.
Gjatë fundjavës, në Rrugën e Kombit janë skanuar nga makina inteligjente, shpejtësi që varionin nga 138 km/h deri në 170 km/h.
Si rezultat janë pezulluar 106 leje drejtimi të drejtuesve të automjeteve me targa shqiptare, si dhe janë vendosur 131 masa administrative, me vlerë 40.000 lekë të rinj, për drejtues të automjeteve me targa kosovare.
Gjithashtu, gjatë fundjavës janë skanuar nga makina inteligjente dhe radarët automatikë në lëvizje, 243 drejtues automjetesh që qarkullonin me shpejtësi nga 125 km/h deri në 133 km/h, të cilët janë ndëshkuar me masa administrative.
