Konkurenca me Blue Panorama, Alitalia me avionë “bosh”
Çmimet e biletave të avionëve për në Romë e Milano kanë rënë sërish në nivelet e mëparshme prej 130 deri në 160 euro. Ulja besohet se erdhi pas konkurencës së fortë me Blue Panorama e cila operon në të njëtët destinacione. Agjencitë e udhëtimit pohojnë se çmimet kanë rënë drejt Romës dhe Milanos, ku Alitalia ka linja të shpeshta fluturimesh të përditshme. E konkurruar nga Blue Panorama, Alitalia u gjend përballë avionëve të “boshatisur”. Nëse prenoton sot në internet për një biletë vajtje ardhje në Romë, në datat 6-14 gusht, në orare të caktuara mund të gjesh dhe një biletë 130 euro. Pak javë më parë, kur çmimet u rritën, minimumi ishte 220 euro. Edhe për në Milano mund të gjesh bileta në gusht, vajtje- ardhje me 160 euro.
Por drejt destinacioneve të tjera, ku konkurrenca është më e ulët çmimet mbeten të shtrenjta. Për në Bolonja, në të njëjtat data në gusht, nuk gjen biletë më lirë se 260 euro. Për në Firence bileta minimale është 290 euro. Nëse do të shkosh në gusht në Venecia, minimum i biletës është 313 euro (vajtje –ardhje). Sipas të dhënave nga Tirana International Airport (TIA), fluturimet drejt Italisë zënë 60 për qind të totalit të udhëtimeve ajrore.
