9 familjarë të familjes Sadiku janë ngujuar brenda banesës së tyre në rrugën “Fortuzi” me qëllim që të mos lejojnë përmbaruesit të zbatojnë vendimin e gjykatës për t‘ju marrë banesën.
Historia e tyre dhe problemi me pronën u bë i njohur paraditen e djeshme për publikun, ku tre anëtarë të kësaj familje protestuan para Kuvendit, teksa pritej miratimi i reformës për drejtësi. Teksa kërkonin miratimin e reformës në drejtësi, një zonjë e moshuar, një tjetër paraplegjike dhe Mira Sadiku kërkuan takimin me ministrin e Drejtësisë dhe atë të Brendshëm ,me qëllim që të tregonin hallin e tyre.
Ndërsa dje kërkuan drejtësi, zonja Mira mëngjesin e sotëm është ngjitur sipër çatisë së banesës që duhet ta lënë të lirë, ndërsa 9 anëtarë të tjerë janë ngujuar brenda saj, mes tyre një foshnje 4 muajshe. Gazetari i News 24, Erion Skëndaj ndodhet para banesës, ndërsa pas tij zonja Mira mbi çati me një thikë në dorë, Gruaja qëndron aty në shenjë proteste që përmbaruesit të mos prekin shtëpinë. Sipas gazetarit Skëndaj, familja Sadiku pretendon se kjo është pronë e bashkisë dhe se i paguan qira bashkisë, ndërsa familja Çali që pretendon pronësinë thotë se e ka fituar pronën në dy shkallë gjyqësore.
Duke iu referuar gjithnjë zonjës Mira, Skëndaj thotë se “Një nga gjyqtarët që e ka gjykuar çështjen e pronës është Gjin Gjoni. Mira pretendon se dokumentat e paraqitura në gjyq kanë qenë të falsifikuara. Përmbarimi ka ardhur për të zbatuar vendim për një godinë 3 katëshe, ndërkohë që shtëpia është një katëshe”. Kujtojmë se historia e tyre ka vite që zgjat dhe se një nga personat brenda familjes në vitin 2013 u përplas me armë me përmbaruesit privat.
