Në 2016 në Gjykatën Administrative të Apelit u mbartën 12.000 çështje
Konfliktet mes biznesit dhe administratës shtetërore kanë mbytur në dosje Gjykatën Administrative. Abuzimet e tatimeve, doganave dhe agjensive të prokurimeve kanë bërë që për vitin 2016 në Gjykatën Administrative të Apelit të mbarten plot 12 mijë çështje, të cilat do të duhet të gjykohen nga vetëm 7 gjyqtarë që ka ky institucion.
Rastet më të shumta të konflikteve biznes administratë janë paditë dhe ankimimet të bëra ndaj vendimeve të tatimeve. Gjatë vitit 2015 vetëm në Gjykatën Administrative të Shkallës së Parë në Tiranë janë trajtuar në total 611 çështje, nga të cilat në 534 paditen tatimet dhe në 67 raste tatimet janë në rolin e paditësit. Natyra e çështjeve ka të bëjë kryesisht me gjobat e vëna nga tatimet për moslëshim kuponash tatimore, mos pajisje me kasë fiskale, evazion etj. Më të pakta në numër janë rastet e mbërritur në gjykatë për Doganat. Në total për vitin 2015 janë arkivuar 120 raste, nga të cilat 180 biznesi ka paditur doganat dhe vetëm 2 raste këta të fundit kanë qenë paditës.
Për vitin e kaluar shifër të lartë ankesash janë regjistruar edhe për vendimet e Inspektoriateve të ndryshme që veprojnë në vend, kryesisht për atë Qendror Teknik për të cilin ka 243 çështje, ndërsa për Komisionet e Prokurimeve Publike në 2015 janë arkivuar 105 raste ankimim. Ky fluks I lartë ankesash gati e ka bllokuar gjykatën Administrative. Në fillim të muajit mars Këshilli i Investimeve raportoi se gjykatat administrative e kanë të pamundur shqyrtimin e çështjeve brenda afateve ligjore.
