Komuniteti Mysliman i ka ardhur në ndihmë banorëve të izoluar nga dëbora në vend, duke i bërë thirrje të gjithë myslimanëve që të japin kontributin e tyre për t’i ardhur në ndihmë këtyre banorëve.
Nën/Kryetari i KMSH Gazmend Aga iu ka bërë thirrje të gjithë besimtarëve mysliman shqiptar dhe më gjerë që të gjendemi në mbështetje familjeve të izoluara në veri të vendit nga bora.
Ata kanë vendosur edhe një arkë ku çdo qytetar mund të hedhë kontributin e tij, kontribut i cili më pas do të trokasë në dyert e familjeve të izoluara për t’ia lehtësuar sadopak vështirësitë e këtyre ditëve të ftohta dimri.
Komuniteti Mysliman i Shqipërisë, ka vënë në dispozicion të qytetarëve edhe një numër llogarie ku mund të dërgojnë kontributin e tyre: BKT 110000709, IBAN: AL 14 2051 1014 000709 CL TJCL ALLO, ku mund të dërgohen donacione me emërtimin “Kontribute për zonat e izoluara nga moti”.
Një pjesë e madhe e Shqipërisë vijon të jetë e mbuluar nga bora. Ndërsa në veri trashësia e saj vijon të sjellë probleme në qarkullim dhe emergjenca të shumta shëndetësore. Prej 15 ditësh, të izoluara mbeten dhjetëra fshatra në veri të vendit, kryesisht në Tropojë, Has, Pukë, Kukës, Malësi e Madhe, Dibër dhe Mirditë.
