Dy ditë pas zgjedhjeve vendore të 30 qershorit, Komiteti Shqiptar i Helsinkit prezantoi gjetjet paraprake të bazuara mbi monitorimet e organizatës në terren, ku 115 vëzhgues të organizatës monitoruan situatën në qytetet kryesore të vendit.
Drejtoresha ekzekutive Erida Skëndaj vlerësoi se intimidimet, retorikat joetike dhe akuzat e ndërsjella “kanë ndikuar në humbjen e besimit të qytetarëve për të ushtruar të drejtën kushtetuese të votës”.
“Vëzhguesit e KSHH kanë vërejtur prezencën e personave të paautorizuar në ambientet e brendshme të QV dhe në ambientet e jashtme, por brenda perimetrit të godinës ku ishin vendosur QV. Janë vërejtur grupe të të rinjve. Na rezulton se persona të paautorizuar prezantoheshin si përfaqësues partiak dhe informonin për numrin zgjedhor të zgjedhësit që votonte. Kjo nuk është e lejueshme sepse në këtë mënyrë kërkohen të dhëna për të identifikuar ata që votojnë dhe ata që nuk votojnë. Kjo në vlerësimin tonë përbën një formë indirekte të intimidimit ndaj zgjedhësve. Jo të gjithë anëtarët e komisionit të QV në qytetet ku është shtrirë monitorimi janë trajnuar me cilësi dhe në kohën e duhur. Kjo ka ndikuar në disa raste në shkeljen e fshehtësinë e votës, lejimin e votimit familjar në rreth 8% të totalit të qendrave të vëzhguara nga komiteti”, tha Erinda Skëndaj.
