Deputetët e opozitës nisën të rimbledhin firmat dhe këtë të hënë kanë depozituar kërkesën e 35 deputetëve për ngritjen e Komisionit Hetimor për të verifikuar zbatimin e ligjit për investimet strategjike. Por kjo çështje u kthye edhe në temë diskutimi brenda opozitës për shkak se deputeti Gazment Bardhi akuzoi Sali Berishën se ka bashkuar votat me Ramën për të bllokuar ngritjen e këtij Komisioni.
“Merri leje doktorit, dhe sqaro demokratët pse u bashkuat me PS-në për të bllokuar komisionin për investimet strategjike. Pse i ka nis Berisha mesazh deputetëve që të bëhen bashkë për të bllokuar komisionin” – tha Bardhi.
Në dokumentin e firmosur, shihet se asnjë nga deputetët që ndjekin linjën e Berishës nuk ka firmosur për ngritjen e këtij Komisioni, me përjashtim të deputetit Bujar Leskaj që kishte firmosur edhe më parë.
“Madje deputetja Ina Zhupa që kishte firmosur fillimisht, por që i është bashkuar sëfundmi zoti Berisha, është tërhequr nga nisma duke mos ju bashkuar më grupit nismëtar” – thuhet në reagimin e grupit të deputetëve të PD që kanë propozuar ngritjen e komisionit.
