Arben Ristani sulmon me fjalor rruge kolegun e tij socialist, Ulsi Malaj.
Ka dështuar për të dytën herë dëshmia e Shkëlzen Berishës në komisionin hetimor për çështjen CEZ, i mbledhur sërish pasditen e kësaj të hëne.
Shkak është bërë sërish refuzimi i Berishës për të bërë betimin përpara kryetarit Balla, i dënuar për shpifje në dëm të djalit të ish-kryeministrit.
Seanca nisi me debate të ashpra, pasi Shkëlzen Berisha nuk bëri betimin, e cila i kërkohej vazhdimisht nga kryetari i Komisionit Hetimor Taulant Balla.
Shkëlzeni ka debatuar me Taulant Ballën duke pyetur në nisje se kush e drejtonte komisionin, ndërsa e quajti “të dënuar”. Ky i fundit tha se këtë komision e drejtonte ai dhe se fillimisht duhej të betohej që të dëshmonte.
Ka patur një përplasje në komision mes deputetit demokrat Arben Ristani dhe atij socialist Ulsi Malaj. Ristani ka përdorur një gjuhë shumë banale dhe të ashpër ndaj kolegut të tij të majtë.
Pas largimit nga komisioni hetimor Shkëlzen Berisha deklaroi se ka bërë padi penale në adresë të Romeo Karajt, të cilin e konsideron si burimi i shpifjes, për të cilën i kërkohet të dëshmojë në komisionin hetimor.
Djali i ish-kryeministrit tha që as i njeh dhe as i ka takuar ndonjëherë njerëzit që akuzohen për aferën e CEZ.
