Komisioneri Publik ankimon vendimin për drejtuesen e Prokurorisë së Krimeve të Rënda, Donika Prela.
Sipas Komisionerit Prela nuk duhet të ishte konfirmuar në detyrë nga Komisioni i Pavarur i Kualifikimit duke kërkuar shkarkimin nga detyra tek Kolegji i Posaçëm i Apelimit.
Komisioneri Publik, brenda afatit ligjor, ushtroi ankim në Kolegjin e Posaçëm të Apelimit, pranë Gjykatës Kushtetuese, kundër vendimit nr. 103, datë 5.2.2019, të Komisionit të Pavarur të Kualifikimit, për subjektin e rivlerësimit znj. Donika Prela, magjistrate/prokurore, drejtuese në Prokurorinë pranë Gjykatës së Shkallës së Parë për Krime të Rënda.
Prela kaloi me sukses procesin e vettingut por mesa duket Komisioneri Publik nuk është dakord me këtë vendim të KPK, marrë më datë 5 shkurt 2019.
Kujtojmë se pas procesit të Vettingut, Prela, drejtuesja e Prokurorisë së Krimeve të Rënda aplikoi për t’u bërë pjesë e Strukturës së Posaçme Anti-Korrupsion (SPAK).
Struktura e Posaçme kundër Korrupsionit dhe Krimit të Organizuar do të ketë si objektiv korrupsionin e zyrtarëve të lartë dhe krimin e organizuar. Me ngritjen e Prokurorisë dhe Gjykatës speciale, hapet dhe rruga për krijimin e Byrosë kombëtare të hetimit, e cila do të funksionojë sipas modelit të FBI-së amerikane.
