Komisioneri i Zgjerimit të BE-së në largim Johannes Hahn deklaron se Maqedonia e Veriut dhe Shqipëria meritojnë hapjen e negociatave me Bashkimin Evropian.
Në një intervistë me gazetën malazeze “Vijesti”, Hahn shprehet se është krenar për reformat që janë arritur në Shqipëri, veçanërisht procesin e verifikimit të të gjithë gjyqtarëve dhe prokurorëve.
“Si Maqedonia Veriore ashtu edhe Shqipëria meritojnë të fillojnë negociatat e anëtarësimit në BE. Ne kemi bërë gjithashtu shumë përparim në bashkëpunimin rajonal. Në të ardhmen, një fokus i veçantë do të jetë në zhbllokimin e mëtejshëm të potencialit ekonomik të rajonit”- ka thënë Hahn.
Ndër të tjera Hahn tha se BE do të vazhdojë të mbështesë udhëtimin e Ballkanit Perëndimor drejt integrimit evropian, i cili është në interes të Unionit.
