Komandanti i Forcave Amerikane në Evropë tregon kur do të largohet KFOR nga Kosova

Komandanti i Ushtrisë së ShBA për Evropën, Ben Hodges ka deklaruara se së paku edhe 5 vjet NATO do të qëndrojë në Kosovë.

Në një intervistë për portalin serb Insajder.net, i pyetur se a ekziston një plan që KFOR-i të largohet nga Kosova, Hodges, është përgjigjur se për këtë çështje “vendos Aleanca”.

“Unë e kam për detyrë të siguroj pjesëmarrjen e ushtarëve të SHBA-ve në misionin e KFOR-it. E, me sa e shoh unë, të paktën pesë vjet s’e kemi ndër mend ta braktisim Kosovën sepse janë siguruar resurset për 5 vitet e ardhshme”, ka thënë Hodges.

Në pyetjen se a qëndron problemi me Qendrën Ruso-Serbe në faktin se gjendet afër bazës Bondstil në Kosovë, Hodges është përgjigjur se ajo qendër do të duhej të punojë në mënyrë transparente dhe se ai do të kishte dashur të marrë një ftesë për ta vizituar.

“Unë nuk besoj se ajo është një qendër humanitare, ajo është një fasadë dhe nuk është e tillë çfarë prezantohet”, është shprehur gjenerali amerikan.