Pas akuzave të “Rilindjes Demokratike” në drejtim të saj, ka reaguar Ministrja e Mbrojtjes, Mimi Kodheli
Në shkrimin e publikuar sot nga gazeta RD thuhej se Kodheli ka shpenzuar 1 miliardë lekë për zyrën e ministres dhe tualetin, ndërsa për operacionet kundër zjarrit janë vënë në dispozicion katër herë më pak para.
Kodheli thotë se zyra e minsitrisë që ajo drejton është modeste, por brenda standardeve të NATO-s, kur vjen puna për sigurinë.
Më tej ajo këshillon faqosësit e gazetës ku u thotë: “Tjetër herë mos i ngatërroni zjarret e vapës me ato të Gërdecit se mund të digjeni edhe vetë!”
Reagimi i plotë i Kodhelit
Mjerimi i një fundkazani si gazeta RD është vërtet për të ardhur keq. E lindur si shprehje e lirisë së fjalës, prej vitesh, kjo gazetë, është kthyer në një banalitet, ndaj dhe askush se merr seriozisht. Vërej me keqardhje që ditet e vapës i kanë bërë akoma më të tollovitura kokat e nxehta të atyre që i kanë mbetur akoma në punë kësaj gazete pa sherbet, por me shumë rrena dhe helm brenda.
Zyra e MM është një zyrë shteti modeste, por brenda standardeve NATO, kur vjen puna për sigurinë. Një nga klasat e Akademisë u transformua në zyrën e MM, por asnjë qindarkë nuk i është marrë parave të buxhetit të Ministrisë.
Një këshillë faqosëve të gazetës: tjetër herë mos i ngatërroni zjarret e vapës me ato të Gërdecit se mund të digjeni edhe vetë!
