Kryetari i Bashkisë së Tiranës, Erjon Veliaj, ka pranuar problemet që ka klubi i futbollit Tirana por ka theksuar se këto probleme nuk mund ti faturohen vetëm Bashkisë, pasi ajo është në minorancë në bordin e aksionerëve, pasi ka vetëm 34 për qind të aksioneve. Komentet, Veliaj i bëri sonte në emisionin e Enkel Demit në TVSH, “Shih Programin”. Madje Veliaj tha se ka disa ide për mënyrën se si duhet forcuar ky klub futbolli, një prej tyre është shitja e aksioneve të Bashkisë tek tifozët e Tiranës.
“Jam gati ti nxjerr në treg aksionet e Bashkisë, jam gati t’ua shpërndaj tifozëve . Besoj se vetëm duke i komercializuar sportet mund ti forcojmë. Misioni i bashkisë është të inkurajojë sportet”, tha ndër të tjera Veliaj. Ndërkohë ai shtoi se Bashkia do të japë pjesën e vet në kohë për borxhet emergjente që ka klubi në UEFA, ndërsa pranoi se klubi trashëgon probleme dhe borxhe nga e kaluara, ku vetëm me gjygje të humbura ka një faturë prej 1.5 milionë dollarë.
“Garantoj tifozët se për borxhet emergjente të Klubit për pagesat në UEFA Bashkia do të përgjigjet për pjesën e vet të aksioneve për situatën emergjente. Në afatgjatë do të na duhet të ndalojmë improvizimet dhe të kemi sjellje korrekte nga të gjithë aksionerët”, shtoi ai.
Ndërkohë Veliaj nuk komentoi ndeshjen e sotshme mes Skënderbeut dhe Partizanit, duke u shprehur se i mungonte përqendrimi afatgjatë për të par ënjë ndeshje nga fillimi në fund, ndërsa shtoi se është i apasionuar pas futbollit dhe luan shpesh dhe mirë.
/27.al/
