Tenderat publikë fitohen nga firmat që kanë njohje politike
Shoqata e sipërmarrjes gjermane në Shqipëri vlerëson se në vendin tonë ka përkeqësim të klimës së biznesit. Në një anketim të bërë nga gjermanët që operojnë në vendin tonë, të publikuar sot, vlerësohet se administrata publike, prokurimet publike dhe niveli i lartë i korrupsionit janë pengesa serioze për të zhvilluar bniznes në Shqipëri. Rolf Castro –Vasquez, President i Shoqatës Gjermane të Tregtisë dhe Industrisë, në paraqitjen e anketimit të bërë me biznesin, duke ju referuar korrupsionit në tendera sqaron: “Ky është një anketim që zhvillohet paralelisht në 20 vende ku ka Dhoma të Tregtisë dhe Industrisë në Europën Qendrore dhe Juglindore. Një nga dhe çështja mbi transparencën e tenderave iu drejtohet të gjithë bizneseve. Shkalla e vlerësimit është nga 1 deri në 6 sipas një metodologjie gjermane në bazë të situatës aktuale jepet dhe përgjigjia. Në bazë të përgjigjes kuptohet pse Shqipëria ndodhet në vendin e parafundit në rajon”. Sipas rezultateve të dhëna nga anketimi i Shoqatës Gjermane të Industrisë dhe Tregtisë (DIHA) në 20 vende nga Europa Lindore dhe Juglindore, Shqipëria renditet e 19-ta. Të vetmin vend që lëmë pas është Kosova. Sipas anketimit 56 për qind e bizneseve të pyetura e vlerësojnë klimën për biznes më 2016 si negative. Vitin e kaluar përkeqësim kishin deklaruar vetëm 47 për qind e të anketuarve.
