Këshilli i Lartë i Drejtesisë ka nisur një hetim për të pestë gjyqtarët që shpallën të pafajshëm 11 anëtarët e bandës “Hakmarrja për Drejtësi”.
Presidenti i Republikës, njëherazi Kryetar i Këshillit të Lartë të Drejtësisë ka kërkuar fillimin e hetimeve nga Inspektoriati i KLD-së për të pestë gjyqtarët.
“Nga shqyrtimi paraprak i ngjarjes së transmetuar dhe nga shqetësimi i ngritur nga Presidenti i Republikës, u konstatua se ka vend që Inspektorati i KLD-së, të verifikojë veprimtarinë gjyqësore të gjyqtarëve të Gjykatës së Apelit për Krime të Rënda Tiranë”, thuhet në njoftim e KLD.
Më tej ajo sqaron se me anë të këtij hetimi duhet të sqarohet “nëse gjyqtarët që kanë gjykuar çështjen penale në fjalë: haptazi nuk i janë referuar ligjit ose fakteve për shkak të pakujdesisë së rëndë ose dashjes; apo në mënyrë të pajustifikuar, kanë kryer akte dhe sjellje të papërshtatshme gjatë ushtrimit të detyrës ose jashtë saj, që diskreditojnë pozitën dhe figurën e gjyqtarit ose që dëmtojnë rëndë besimin e publikut në sistemin gjyqësor”.
Pesë gjyqtarët që do jenë në hetim nga KLD janë: Alaudin Malaj, Artur Kalaja, Stavri Kallço, Sotiraq Lubonja, Etleva Temo.
Gjyqtarët shpallën ditën e djeshme pafajsinë për 11 të pandehurit të cilët akuzoheshin për 17 vepra penale.
