Nga Arlinda Guma
Si shpjegohet që këta që thonë për atë djalin “Mirë ia bëri që e vrau”, asnjëherë nuk e vendosin ë-në aty ku duhet?
(“bravo djali, dashuri e sinqert“, thoshte një koment)
Do thoni ju që kjo nuk është çështje drejtshkrimi, po, sigurisht që nuk është, por nëpërmjet ë-së mund t’i bëjmë një profil psikologjik një brezi të tërë.
Këta nuk janë rritur me bibloteka, në kohërat e fëmijërisë së tyre mendohej se çdo gjë socialiste duhej të shkatërrohej, kështu që u zhdukën nga faqja e dheut librat.
Këta janë rritur me tekste mësimore që u mësonin se gjermani erdhi në Shqipëri për të bërë një lojë kalçeto. Se nazizmi dhe fashizmi janë të mirë, dhe se ata nuk ishin pushtues. Se gjermanët ndërtonin shtëpitë e popullit që digjnin partizanët. Nuk ka asnjë ndarje në këto tekste midis antifashizmit dhe komunizmit.
Këta kujtojnë se Skënderbeu ishte bastexhi garash me kuaj. Një kolegu im më pyeti njëherë nësë Skenderbeu vdiq vetë apo e kishin vrarë…
Këta rriten me tekste perverse mësimore ku vajzat e vogla i mësojne t’i shohin djemtë seksualisht.
Këta Ndre Mjedën e kujtojnë ndonjë mjek popullor që kuron sëmundje me mjedra.
Fëmijëria e tyre i përkon kohërave të glorifikimit të të fortit. Ai tipi që kishte shitur disa vajza duke i gënjyer se do martohej me to, ndërkohë që familja i rrihte krahët si djalë i zoti, ndërsa vajzat e gjora nxirreshin jashtë nga shtëpia se kishin turpëruar familjen.
Njëherë e pyeta agjentin e shpërndarjes së librit tim te Toena se pse në disa qytete nuk ishte shpërndarë libri im… – Sepse këto qytete nuk kanë fare librari, – ma ktheu, dhe unë e qepa. Pra nuk kanë një kioskë të thjeshtë ku të shiten librat, imagjino që biblotekë jo e jo, ndërkohë që kohëra më parë ka patur bibloteka edhe në zonat më të thella.
E ç’mund të presësh pastaj nga ky brez? Këta që e vendosin gabim ë-në, nesër mund të djegin libra në shesh, sepse nuk kanë asnjë ndjeshmëri ndaj tij, mund të vrasin vajza lirisht, mund të krijojnë një Aushvic të ri, mund t’i vënë flakën planetit.
Dhe ende e mendoni vendosjen gabim të ë-së vetëm si çështje drejtshkrimi?
Po ajo duhet të bëhet çështje kombëtare. Treguesi më i saktë i rrënimit tonë si komb!
