Këshilltarja e Kryeministrit, Meliza Haradinaj-Stublla ka komentuar intervistën e kryeministrit të Shqipërisë, Edi Rama për median serbe TV Pink.
Ajo në një status në Facebook ironizon faktin që kryeministri shqiptar ka gjetur një media serbe për të sqaruar mbi taksën ndërsa thotë “Kryeministri Rama paska zgjedhur një media serbe nga Beogradi, TV Pink, për të sqaruar deklaratat e tij rreth taksës dhe Kosovës, pas takimit të Berlinit.”
Meliza Haradinaj ka thënë se Rama edhe në këtë intervistë, nuk resht së ritheksuari se taksa qenka klithmë politike që tani e sa kohë ka bllokuar dialogun me Serbinë.
“Kryeministri Rama paska zgjedhur një media serbe nga Beogradi, TV Pink, për të sqaruar deklaratat e tij rreth taksës dhe Kosovës, pas takimit të Berlinit. Edhe në këtë intervistë, Rama nuk dështon së ritheksuari se taksa qenka klithmë politike që tani e sa kohë ka bllokuar dialogun me Serbinë, dhe e barazvlerëson veten me Kancelaren Merkel dhe Presidentin Macron – duke thënë që bashkë me ta në Berlin ka avokuar për pezullim të taksës…!
Analogjia që po tentohet – duke përdorur taksën si urë lidhëse për të sulmuar ata që korrën fitore epike kundër idesë së ndarjes, korrigjimit,shkëmbimit, është strategji e dështuar në kohë të gabuar të historisë” -ka shkruar ajo.
