Shumë pacientë që vuajnë nga hipertensioni, janë kureshtarë të dinë nëse mund ta kontrollojnë tensionin e gjakut pa marrë ilaçe? Përgjigja është e thjeshtë: Po, është e mundur.
Sipas ekspertëve, hipertensioni jo shumë i lartë i gjakut mund të normalizohet me sukses duke bërë disa ndryshime në jetën e përditshme si dhe në regjimin ushqimor. Të njëjtat udhëzime vlejnë edhe për rastet e hipertensionit të mesëm dhe atij shumë të lartë, por gjithmonë duke e kombinuar atë me terapitë e dhëna nga mjeku specialist, për të pasur rezultat më të mirë.
Në vazhdim do t’i gjeni disa udhëzime të shkurtra si të jeni në gjendje që të kontrolloni hipertensionin tuaj arterial.
Humbisni kilogramët e tepërt
Mungesa e peshës së tepërt është një hap tepër i rëndësishëm në normalizimin e hipertensionit. Madje nuk është e rastit që shpesh personat që vuajnë nga hipertensioni përfshihen në kategorinë e njerëzve me mbipeshë. Rreziku nga kilogramët e tepërt është më i madh kur mbipesha është grumbulluar në disa pjesë të trupit, konkretisht në bark dhe kraharor. Të mirat e mungesës së mbipeshës janë të shumta. Përveç se ajo ndikon në uljen e tensionit të lartë arterial, vepron edhe në rënien e nivelit të kolesterolit etj. Gjithashtu, ndihmon në rregullim e niveleve të sheqerit në gjak në rast diabeti. Mos harroni se kombinimi i tensionit të lartë, i kolesterolit në rritje dhe diabetit përbën një faktor tepër rëndues për funksionimin normal të sistemit kardiologjik.
Lëvizni sa më shumë
Specialistët ju këshillojnë të sëmurëve me tension të lartë që të ecin të paktën tre herë në javë për 45 minuta (është kjo koha që nevojitet mesatarisht për të përshkuar një distancë prej 4 kilometrash). Përkundrazi, ata ndalojnë ushtrimet me peshë pasi në këtë mënyrë rritet shumë presioni arterial dhe vonon që të vijë në nivele fiziologjike. Ndërkaq, nuk përjashtohet që një i sëmurë me hipertension të kryejë ushtrime me pesha, por kjo do të realizohet vetëm pasi ai të ketë nisur tashmë një program ushtrimesh aerobike, sipas këshillave të mjekut të tij dhe në bazë të rezultateve të analizave të domosdoshme (si p.sh. test i lodhjes etj.).
Thoni “Jo” duhanit
Duhani shkakton çarjen e kapilareve dhe ndikon në humbjen e elasticitetit të tyre. Është provuar se madje edhe një cigare është e aftë të shkaktojë çarje dhe kjo sepse presioni i gjakut, që qarkullon në brendësi të kapilarëve, rritet. Përveç tensionit të gjakut, shpeshtohen edhe rrahjet e zemrës pasi kjo e fundit është e detyruar të punojë më tepër me qëllim që të mbulojë nevojat e organizmit me oksigjen. Me ndërprerjen e duhanit muret e kapilareve bëhen më elastike, ndërsa zemra punon me ritëm normal dhe nuk lodhet.
Kontrolloni stresin
Megjithëse kjo këshillë është e vështirë që të zbatohet, pasi stresi është i pranishëm në jetën tonë të përditshme, e vërteta është se nëse dëshironi ta përballoni me sukses hipertensionin duhet të kontrolloni stresin. Me fjale të tjera, stresi funksionon sikurse duhani, duke çuar në rritjen e tensionit të gjakut. Personat e brezit të tretë janë më të prekur nga hipertensioni pasi kapilarët e tyre janë më të fortë, më shumë pak elasticitet, për shkak të moshës.
Kujdes regjimin ushqimor
Ekspertët thonë preferoni dietën me peshq dhe zarzavate:
– Peshqit (si sardelet, salmoni etj.) përmbajnë tre përbërës yndyrorë të cilët është provuar se ndihmojnë në uljen e tensionit të gjakut. Studimet rreth kësaj çështje janë realizuar në popuj të cilët konsumojnë shumë peshk, si p.sh. eskimezët. Natyrisht që efekti i këtyre përbërjeve tek ju varet nga shpeshtësia e konsumimit të peshkut. Mirë është që të preferoni të hani peshk dy herë në javë dhe të kufizoni konsumin e mishit të viçit, derrit, pulës etj. deri në një herë në javë.
– Frutat dhe zarzavatet kanë në përbërjen e tyre lëndë të cilat ndihmojnë në ruajtjen e kapilarëve në gjendje sa më të mirë. Pjesa e brendshme e tyre “sulmohet” nga tensioni i lartë i gjakut, kolesteroli dhe diabeti. Në saje të lëndëve të vlefshme që përmbajnë frutat dhe zarzavatet, kapilarët qëndrojnë hapur duke lehtësuar qarkullimin sa më normal të gjakut. Specialistët propozojnë që të gjitha vaktet tuaja të kenë në përbërjen e tyre fruta, zarzavate dhe sa më pak yndyrë mishi.
Rregulloni temperaturën e shtëpisë
I ftohti është një faktor rëndues për hipertensionin, megjithëse shumë e injorojnë. Nuk është e rastit që në verë kardiologët zvogëlojnë sasinë e ilaçeve kundër hipertensionit, për shkak se nxehtësia ul tensionin. Përkundrazi, ndenja në të ftohtë rrit presionin arterial. Ndaj është e rëndësishme që shtëpia juaj të jetë e ngrohtë.
Njohuri rreth hipertensionit
Simptomat
Hipertensioni zakonisht zhvillohet pa shumë ndërlikime, por në raste të tensionit të lartë paraqet simptoma të tilla sikurse:
- Dhimbje koke
- Marramendje
- Dhimbje dhe ndjenje rëndese në gjoks
- Pagjumësi
- Urinim i shpeshtë
- Etje e madhe
- Dobësi muskulore dhe humbje ekuilibri.
Rreziqet që shkakton hipertensioni
- 40% e të sëmurëve me tension rrezikojnë të pësojnë hemorragji cerebrale.
- 16% e tyre rrezikojnë të pësojnë infarkte në zemër.
- Sëmundja kërcënon edhe organe të tjera të trupit sikurse veshkat.
Hipertensioni në shifra
- 25-30% e evropianëve të rritur vuajnë nga hipertensioni.
- 14% e amerikanëve të rritur vuajnë nga hipertensioni.
- 80% e të sëmurëve me hipertension nuk i nënshtrohen udhëzimeve për përmirësimin e tensionin te tyre. Kjo kushtëzohet edhe nga mungesa e përditshme e ilaçeve, kostoja e lartë e tyre, pastaj frika nga reaksione të mundshme të terapisë me ilaçe (rënie e shpejtë e tensionit, kollë etj.) si dhe nga mungesa e komunikimit dhe besimit mes të sëmurit dhe mjekut.
- 95% e rasteve me hipertension nuk u dedikohen ndonjë sëmundje tjetër (p.sh. çrregullime nervore, probleme hormonale).
/Telegrafi/
