79.4 mijë megavat energji u shit me 18.8 euro për megavat orë
Pasi ka furnizuar me të gjithë sasinë e nevojshme të energjisë elektrike për OSHEE, prodhuesit publik KESH i është dashur që për të menaxhuar kaskadën e Drinit të prodhojë edhe më shumë. Falë reshjeve të bollshme kompania ka rezultuar me një tepricë energjie prej rreth 79.4 mijë megavat e cila është shitur në tregun ndërkombëtar me cmim mesatar 18.8 euro për megavat orë.
Sasia e tepërt e energjisë sipas burimeve të KESH do të shitet për tregjet e huaja në periudhën kohore nga 21 deri më 29 shkurt.
Procedurat e tenderimit për shitjen e energjisë janë mbyllur në datën 19 shkurt, nga ku është konkluduar që sasia e tepërt e energjisë do të lëvrohet nëpërmjet 7 kompanive private vendase e të huaja.
Sipas të dhënave zyrtare energjia është shitur me një çmim mesatar prej 18.8 euro për megavat orë. Ky çmim është ndjeshëm më i ulët se cmimi referent i këtij tregu që merret në bursën hungareze, i cili ka qenë 24 euro për megavat orë në kohë normale dhe 30 euro për megavat orë në kohë piku. Këtë anomali ekspertët e kompanisë e kanë shpjeguar me faktin se enegjia do të shitet në fasha kohore që kushtojnë më lirë se çmimet bazë.
