Deputeti demokrat Ervin Salianji, ka komentuar kërkesën e SPAK në Kuvend për arrestimin e deputetit Alqi Bllako, pasi rezulton si i përfshirë në aferën e inceneratorëve.
Salianji tha për mediat se e gjithë kjo do të shqyrtohet ditën e nesërme, ku pritet të mblidhet Këshilli i Mandateve për të shqyrtuar kërkesën e SPAK, pjesë e të cilit është edhe Salianji.
“Sipas ligjit, në seancën e parë plenare pas marrjes së kërkesës duhet të shqyrtohet. Kështu të shohim nesër. Duhen shqyrtuar të gjitha për të mos lënë asnjë vend për çfarëdolloj interpretimi. Nesër do jemi prapë”, tha Salianji.
Mësohet se, kryetarja Lindita Nikolla ka thirrur ditën e nesërme mbledhjen e Këshillit të Mandateve, që përbëhet nga 10 deputetë, të mazhorancës dhe opozitës për të shqyrtuar kërkesën e SPAK dhe ndërmarrjen e hapave konkrete.
