Agjencia e Mbikëqyrjes Policore (SHÇBA) ka reaguar pas lajmit ku u tha se Euglen Benga, truproja i kryetares së Kuvendit, Lindita Nikolla, u nxori armën protestuesve të Paskuqanit që e sulmuan. SHÇBA njofton se kanë nisur verifikimet për nxjerrjen e përgjegjësive dhe zbardhjen e plotë të rrethanave të ngjarjes.
“Pas publikimit në media të pamjeve ku shfaqet një punonjës i Gardës së Republikës që ka nxjerrë armën e shërbimit gjatë një proteste në zonën e Paskuqanit, Shërbimi për Çështjet e Brendshme dhe Ankesat (Agjencia e Mbikëqyrjes Policore) ka nisur verifikimet për nxjerrjen e përgjegjësive dhe zbardhjen e plotë të rrethanave të ngjarjes. SHÇBA (AMP) mbetet e përkushtuar në misionin e saj për garantimin e zbatimit të ligjit dhe falënderon mediat dhe qytetarët për kontributin” – thuhet në njoftim.
Kujtojmë se ditën e sotme banorët e Babrrusë, Paskuqanit dhe të “5 majit” janë mbledhur për të protestuar kundër shembjes së shtëpive të tyre duke bllokuar rrugën. Bllokimi ka sjell dhe një incident, pasi në momentin që protestuesit ndodheshin tek rruga, një prej drejtuesve të automjeteve i veshur civil, ka nxjerrë armën dhe ka kërcënuar protestuesit.
