Kryetari i Partisë Demokratike Sali Berisha ka mbajtur sot një takim me kryetarët e degëve të Tiranës, të deleguar, kryetarët e FRPD në degë, dhe kryetaret e Lidhjes Demokratike të Gruas, një ditë përpara protetsës së njoftuar nga opozita përpara parlamentit.
Duke ju referuar protestës së një dite më parë, Berisha përmendi vëmendjen që ajo mori në mediat ndërkombëtare dhe nuk kurseu akuzat ndaj kryeministrit Rama.
“Ne bëmë një gjë të jashtëzakonshme. Treguam se ka një popull që nuk pajtohet me aktet kriminale të Edi Ramës dhe se është vendosur ta arkivojë në banesën e tradhtarëve dhe hajdutëve këtë kriminel, që rekruton kryezbuluesin e SHBA për të lufutuar opozitën, sepse sipas tij vendi nuk duhet të ketë opozitë”, tha Berisha që theksoi edhe një herë se protesta e së shtunës ishte nisja e një revolucioni paqësor.
“Në një revolucion paqësor demokratik, ne përmbysëm diktaturën me votën e lirë”, tha Berisha duke pohuar se kjo nuk ndodhi në një ditë. “Ata që vënë në dyshim suksesin e revolucionit paqësor ose janë naivë ose të etur për gjak. Ne nuk jemi as naivë as të etur për gjak. Kemi nisur një revolucion ndaj regjimit më mafioz të Europës. Do shmangim gjakderdhjen, do vulosim fitoren. Një revolucion paqësor është një proces i qëndrueshëm i mosbindjes civile”, tha Berisha.
