Hajduti: – Alo? Alo? Iriqin kërkoj.
Iriqi: – Fol, Iriqi jam.
Hajduti: – Thuaji atij ministër Lleshit se po ia fut kot. Paska thënë që ne kemi djegur paratë. Vetëm thasët bosh dogjëm. Parave ua caktuam vendin. Po të jetë i zoti le t’i gjejë.
Hajduti: – Jam një nga ata që përlamë dhjetë thasë me euro.
Iriqi: – Policia thotë se jeni 12 copë hajdutë.
Hajduti: – Po pse duheshim kaq shumë? Në Rinas edhe i vetëm vjedh aeroplanin komplet. Por nuk dinim ta ngisnim ndaj e lamë hë për hë. Se mbase ndonjë ditë kur të jetë Rama i hipur do e çojmë aq larg Shqipërisë sa do gëzohet i madh e i vogël dhe bustin tim do e vendosin në krah të Ismail Qemalit. Ky krijoi shtetin, do thonë për plakun e Vlorës, ky shpëtoi shtetin, për mua. Dhe do jetë goxha bust se jam dhe i pashëm dhe i ri dhe i mençur.
Iriqi: – Si e bëtë planin ?
Hajduti: – Po ç’plan zeza. Unë po përcillja një shok në Vjenë. Kur ai më tha, do vonohemi pak se nuk kanë ardhur paratë. Ç’para, e pyeta. Të bankave, i transportojnë me avion, më tha. Ika drejt makinës sime dhe sa erdhën thasët nxora pistoletën e ujit që lag gocat në shkollë. U dhjenë policët. Mos u trembni, por ngarkoni në furgon krejt paratë. Për një minutë u mbush furgoni. Ngeli një thes në tokë, e shkeli një polic pa dashje. Mos e shkel, hej të shitoftë zana, i bërtita. Qenka tropojan, i tha polici shokut. Hahaha, ndaj barcoletat bëhen me policë. Pastaj ika drejt një ferre. Dogja furgonin dhe u kthyem me betonieren e shokut tim. E rrotullonim kur kalonim para policëve, iu morën mendtë eurove aty brenda. Ja, kaq.
Iriqi: – Sikur keni ikur nga tunelet…
Hajduti: – Po pse do iknim nga tunelet? E nxë betonierën atje.
Iriqi: – Nga Elbasani je ti?
Hajduti: – Kam një të dashur në Elbasan. Yll e bukur është.
Iriqi: – Ministri po thotë se shumë shpejt do iu kapë.
Hajduti: – Kur Lleshi ka hedhur gaz mbi turmat një sasi e ka gëlltitur vetë. E është si i çekuilibruar, i ziu. Sa kapën vrasësin e Tan Santos aq do na kapë dhe ne. Por po i jap ca të dhëna. Morëm euro sa shtatë-fishin e popullsisë shqiptare, emri im nis me L dhe mbaron me I. Jam 21 vjeç, nga qyteza e R…. dhe kam shok Xhelo Qorrin.
Iriqi: – Keni plan për grabitje tjetër?
Hajduti: – Kemi para boll. Do vjedhim veç Ramën sa të na bëjë portretet tona.
Iriqi: – Ne se nuk ia arrini a mund të vidhni Taulantin në vend të tij?
Hajduti: – Që të na ngelet në derë. Askush nuk jep gjë për të.
Iriqi: – Mbase shihemi ndonjë ditë.
Hajduti: – Atje na ke. Rreth Rinasit. Luajmë me oraret e avionëve. Nga që na hoqi llotot. Gëzohemi kur humbim se akoma nuk është harxhuar gjysma e thesit të parë. Ngelëm një javë duke i numëruar aq shumë ishin, megjithëse të gjitha prerje 500.
