Nga Ilir Seci
Lajmi se nji kazan rakie u gjet në burgun e Shënkollit në Lezhë, ishte lajm që u rrëkëllye me fund nëpër portale e rrjete sociale. Lajm qe u distilue nëper analiza e mbushi dopio faqet e gazetave.
Lajm ballë kazani…
Lajm 22 gradësh, safi, pa hile…
Na jena nana e vakive për besë!
Kazan rakie në burg…
Shembujt që vijnë nga tanë historia e burgjeve të botës, madje edhe nga letërsia me këtë temë e tanë botës, janë shembuj të burgosunish që kanë pasë andërr si me futë në qeli ndonji mjet që ndihmon me u arratisë nga burgu, thikë, daltë, lugë ose pirun tek e mbramja. Se jo të tanë kanë fatin e Kontit të Monte-Kristos…
Na gjajmë mjete tjera me sfidue hapsanen… Kazan Rakie.
Kazani i Lirisë.
Studiuesit e kriminologjisë thonë se kur njeriu mbyllet në qeli, në vitet qe kalon aty nis e ban nji soj vetë-reflektimi, nji soj rishikimi të jetës që e pruni deri aty.
Kohe ka boll.
Gjithkush e përjeton në mënyrën e vet atë dramë. Dikush shkallon. Dikush bahet fetar. Dikush bahet letrar. Por në mënyrë kategorike të tanë të dënuemit në qeli kalojnë nji fazë shpirt-kërkimi, (soul-searching) dhe vetë-reflektojnë, për të mirë ose për të keq, mundet me qenë çdonjana. Si duket të denuemëve në burgun e Shënkollit, për me realizue shpirt-kërkimin e plotë u lypej ndihma e avujve të rakisë. Si duket iluminimi që ata kërkonin ishte përtej dimensioneve të qelisë së burgut si dhe lirisë jashtë qelisë. Fakti që ata nuk kërkuen me shti mshehtas në burg dalta ose thika për me çilë tunel e me gjetë lirinë, por kërkuen kazan rakie të jep me kuptue se ata nuk ishin të interesuem për lirinë fizike, por për atë shpirtnore. Të jep me kuptue se dojshin me kalue nëpër do faza transcendetale dhe në vend të trupit duen me lirue shpirtin…
Athue?!
Me e trajtue esëll këtë gja në fakt vetëm dy konkluzione dalin këtu – ose burgu asht ba kaq i lehtë sa mungon vetëm rakia me ba pallë – ose asht tjetra qe si në burg si jashte njisoj asht, kështu që na bjer edhe nga nji dopio!
***
Se për pak harrova…Kazani i rakisë në burg a ishte i regjistruem me numër shasie se para do vjetësh paten qitë ligj me regjistrue kazanat e rakisë…
