Parlamenti Katalonjës ka shpallur pavarësinë nga Spanja. Akti i pavarësisë u mbështet nga 70 ligjvënës, ndërsa deputetët opozitarë bojkotuan votimin.
Vendimi u mor, ndërkohë që Senati spanjoll nisi këtë të premte debatin për masat e marra nga qeveria për zbatimin e nenit 155 të Kushtetutës ndaj Katalonjës.
Kryeministri spanjoll Mariano Rajoy do të nisë diskutimet, ndërsa senati do të japë fjalën e fundit për miratimin e një pakete masash që do të imponojnë sundimin e drejtpërdrejtë në rajonin që pretendon pavarësinë.
Masat përfshijnë largimin e qeverisë katalanase dhe thirrjen e zgjedhjeve të reja rajonale brenda 6 muajsh. Por banoret ne rajon nuk duan zgjedhje të reja.
Edhe lideri katalanas Charles Puigdemont ka përjashtuar opsionin për thirrjen e votimeve të parakohshme, si një mënyrë për ta ndaluar Madridit të vejë në zbatim nenin 155 të Kushtetutës.
Për këtë, Puigdemont tha se i kishte shqyrtuar të gjitha mundësitë për një zgjidhje përmes dialogut, por Partia Popullore në pushtet, nuk i kishte dhënë atij “një përgjigje të përgjegjshme”.
Mediat shkruajnë se ligjvënësit spanjollë janë takuar mbrëmjen e së enjtes për të vendosur për një përgjigje të përbashkët. Nga ana tjetër lideri katalanas Charles Puigdemont mund të aktivizojë shpalljen e pavarësisë së rajonit pas referendumit të 1 tetorit.
Kryeministri Mariano Rajoy, këmbëngul për rikthimin e ligjit në Katalonjë dhe thekson se nuk mund të pranojë kushtet e liderëve rajonale për pavarësi.
Ndërkohë sindikatat e studentëve kanë dalë në protestë masive për të siguruar se masat nuk do të prekin arsimin.
/vizionplus.tv/
