Nga Gentian Çala
Lajmi për dërgimin në Gjykatë nga SPAK-u të ish Kryetarit të Bashkisë të Pogradecit dhe të pesë personave te tjerë dukej si shumë zhurmë për asgjë ose si gjueti e shtrigave në kuadër të projeksioneve për zgjedhjet e ardhshme vendore. E gjitha në kuadër të krijimit të një atmosfere të ndëshkueshmërisë nga organet e reja të drejtësisë. Pra, mendjet diabolike bëjnë një të shtënë e dy të vrara, shmangin një kandidat opozitar për zgjedhjet vendore dhe krijojnë përshtypjen se drejtësia po gjuan peshqit e mëdhenj.
Unë jam pro ndëshkimit të kujtdo që ka abuzuar me paranë publike dhe nuk kam ndërmend të bëj avokacinë e ndokujt, por nuk mund të jem dakord me propagandën fasadë, pabarazinë apo selektivitetin e organeve që merren me zbatimin e ligjit.
Mbushja e mediave me emrin dhe foton e një kryebashkiaku duket si “gjyq popullor” me urdhër e regji. Në kohën e një qeverisje pa kontroll dhe me pushtet ekspansiv tejet të paimagjinueshme, drejtësia duhet të funksionoje kryesisht si frena ndaj abuzimit me pushtetin dhe me paranë publike. Besimi ynë te këto institucione varet nga pavarësia e tyre nga politika dhe veprimi energjik ndaj kujtdo që shkel ligjin, por ngjarjet e ditëve te fundit dhe jo vetëm, dëshmojnë se misioni i tyre ka tendencë që të kompromentohet. Drejtësia e re duhet t’i shmanget akteve me porosi, pasi e keqja nuk kapet për bishti, por nga koka, duke filluar nga abuzuesit madhorë.
Dërgimi në Gjykatë i ish-kryebashkiakut të Pogradecit, duket pak i motivuar (pengimi i zgjedhjeve ishte çështje krejt e debatueshme politike dhe ende ne shqyrtim nga Gj.K.-ja) dhe i ngjan asaj shprehjes “më dërgoi nëna që të laj gojën”.
