Kaos dhe pritje mbi një orë në stacionin e autobusit morën si dhuratë gratë e Shqipërisë për këtë 8 Mars. Ditën e sotme punonjësit e transportit publik në Tiranë kanë marrë veprimin që kishin paralajmëruar më parë, kanë përgjysmuar numrin e urbanëve. Si pasojë, nëpër stacione është krijuar kaos, ndërsa në një deklaratë për mediat Unioni i Transportit Publik ka deklaruar se u detyruan të vijnë në këtë vendim pasi nuk përballojnë dot çmimin e naftës.
Unioni i Transportit ka bërë të ditur se nëse situata do të vazhdojë kështu, mund të ketë rritje të çmimit të biletës. Një alternativë e tyre është që çmimi të dyfishohet duke shkuar në 80 lekë. “Më rëndësishmja që kërkohet është rritja e çmimit të biletës. Kjo për shkak se do t’i jepte një mundësi që të kishim një transport publik në Shqipëri. Çmimi i biletës për të përballuar këtë krizë është llogaritur nga ekspertët tanë diku te 80 lekë për biletë një përdorimëshe. Në këtë formë ne do t’i japim një mundësi transportit që t’u shërbejmë qytetarëve dhe të mos kapitullojmë totalisht. Edhe kur ishte kryetar bashkie Rama dhe Basha, është llogaritur që çmimi i biletës të ishte diku te 50 lek për biletë. Deri atëherë çmimi i naftës është dyfishuar, natyrisht në proporcion të kësaj kemi kërkuar dhe çmimin e biletës”, tha Memaj, kreu i Unionit.
Ndërsa qeveria vazhdon të justifikohet se nuk ka faj dhe mundësi për rritjen e çmimit të naftës. Kujtojmë se javën që lamë pas çmimi i naftës është rritur pothuajse çdo ditë, duke shkuar në 230 lekë/ litër.
