Një banor i fshatit Paçram në bashkinë e Vaut të Dejës është kërcënuar pasi ka refuzuar që të zhvillohet miting elektoral në lokalin e tij.
Mirash Thepi, njëkohësisht edhe pronari i lokalit ka akuzuar kandidatin socialist për Bashkinë Fushë-Arrëz, Fran Tuca se e ka kërcënuar nëpërmjet një telefonate.
Ai i bën thirrje Prokurorisë që të nisë menjëherë hetimin për kërcënimin në adresë të tij.
“Jam banor i fshatit Paçram i bashkisë së Vaut të Dejës. Kam një biznes të vogël, me zor po jetoj pa u marrë dhe me politikë dhe më kërkon kandidati për kryetar i bashkisë së Vaut të Dejës për të bërë një takim elektoral, miting. Unë nuk e pranova dhe sot rreth orës 12, kryetari i Bashkisë së Fushë-Arrëzit merr në telefon. ‘Kam një amanet me ta thënë’, thotë. I thashë thuaje. Më tha ‘që nëse e merr bashkinë ai kryetar, atje ku jeton ti, dyert i ke të mbyllura’. Unë tani vë në dispozicion telefonin tim për prokurorinë për kërcënimin që më është bërë. I bëj thirrje prokurorisë që këtë punë të mos e lërë pas dore”, deklaroi Mirash Thepi.
