Vendi ynë është thesar vlerash për historianët e studiuesit, shqiptarë a të huaj qofshin ata. Ndërsa, në jo pak raste shqiptarët e fragmentarizojnë historinë e kulturën për interesa të përkohshme, ka habitur dashuria e albanalogut kanadez Robert Elsie për vendin e shqiponjave.
Ai ka ndërruar jetë në moshën 67-vjeçare, nga kushte natyrale ndërsa fjalët e tij të fundit ishin: “Dua të prehem në Shqipëri”.
Robert Elsie është emri më i dëgjuar ndër albanologët e fundshekullit të XX dhe fillimshekullit XXI. I lindur më 1950 në Vankuver të Kanadasë, Elsie ishte njohur me shqipen dhe shqiptarët së pari gjatë viteve ’70-të, kur si student në Gjermani, kishte vizituar bashkë me një grup studentësh Tiranën.
Ai vizitoi rregullisht Seminarin e Gjuhës Shqipe në Prishtinë ku përmes njohjeve me kosovarët arriti të mësojë gegnisht.
Elsie ka transmetuar letërsinë shqiptare në botë duke përkthyer në anglisht Migjenin, Lazgush Poradecin e Fatos Kongolin si dhe poemën “Lahuta e Malësisë” së Gjergj Fishtës.
I dekoruar nga presidenti Bujar Nishani, Robert Elsie ishte autor i dhjetëra librash dhe artikujsh nga fushat e albanologjisë.
Elsie, ka përpiluar edhe leksike dhe fjalor të shqipes si dhe ishte autor i një historie të përgjithshme të Shqipërisë dhe të Kosovës. Gjithashtu, ai ka qenë përkthyes gjatë procesit gjyqësor të diktatorit serb Sllobodan Millosheviç në Hagë, ku kishte përkthyer drejtpërdrejt dëshmitarët shqiptarë.
