Kryeministri Edi Rama iu përgjigj akuzave të kryedemokratit Sali Berisha që komentoi të gjitha hyrjet dhe daljet e kryeministrit nga Shqipëria që nga viti 2004 e deri në 2022, ku sipas Berishës vlera e këtyre shpenzimeve përllogaritej 22 milionë dollarë. Të dhënat tregojnë se që nga viti 2013, kur mori pushtetin, Rama kreu mbi 130 fluturime luksi me paratë e shqiptarëve.
Në dokument janë të dhënat e 274 udhëtimeve të kryeministrit, shumica e të cilave me avionë por në disa raste ka dalë me makinë nga pikat kufitare me Greqinë apo Maqedoninë e Veriut. Në lidhje me këtë Rama tha sot se udhëtimet private i ka bërë me shpenzimet e veta, duke akuzuar opozitën për sulmet ndaj tij.
“Kushtet në miniera janë të larta dhe kjo nuk bën lajm. Me siguri e keni dëgjuar se unë kam një taksi që fluturon dhe u kushton shqiptarëve miliona euro. Do ta dëgjoi çdo ditë nga hienat, që nga mëngjesi deri në të gdhirë kanë vetëm këtë punë. Si të shfrytëzojnë këtë periudhë shumë të vështirë të Shqipërisë. Duam apo s’duam jemi të prekur nga lufta, por për fat të mirë këtu lufta nuk vret njerëz dhe shkatërron shtëpi, por ka sjell rritje të çmimit të energjisë dhe inflacion. Është e vërtetë që qysh nga 2020 kur morëm presidencën e OSBE kemi bërë një marrëveshje me Air Albania për të pasur një avion për udhëtimet e punës. Dhe marrëveshja është ripërtërirë e ndryshuar. Dhe që ta dini ju, janë gjëra që sidoqoftë do të sqarohen, Në fund e vërteta triumfon, jo rrena, por do hash dynjanë se rruga është e mbushur me hiena”, tha Rama.
