Kandidati për kryetar të Komunës së Podujevës, Xhemajl Hasani deklaroi para pak ditësh se kishte një makinë sipas tij modeste, një ferrari.
Kandidati i Partisë NISMA gjatë asaj interviste bëri menjëherë bujë pasi të gjithë shprehën habinë se si një makinë mbi 70 mijë euro mund të quhet modeste.
Por ditën e sotme Hasani bëri një “korrigjim” dhe tha per “Shqipëria Live” se “Ferrarin e ka dhuratë nga familja e tij”.
I pyetur nëse ka bërë shaka apo ishte mjaft serioz me deklaratën, Xhemajli tha: “Unë edhe garën e kam marrë me seriozitet. Edhe në atë debat kam qenë serioz. Një makinë modeste, dhuratë nga familja. E kur më tha çfarë është modeste, thashë Ferrari, pasi për mua çdo mjet është modest. Automjetin e kam dhuratë nga familja, edhe shtëpinë ku jetoj. Dhuratë kam edhe vilat. Jetoj një jetë modeste”, shprehet kandidati i Podujevës.
Ndërsa kur u pyet nëse e ka të deklaruar të gjithë pasurinë, Hasani tha: “Të gjitha i kam të deklaruara, lirisht mund të hulumtoni”.
