Një ditë më parë pamë një shfaqje të shëmtuar të policisë në përplasje me qytetarët që protestonin kundër prerjes së pemëve të Liqeni Artificial. E gjithë kjo situatë ka ardhur si pasojë e mungesës së transparencës nga ana e Bashkisë së Tiranës për projektin e këndit të lojrave te parku. Fshehtësia me të cilën bashkia po tenton të ndërtojë çfarë ka ndërmend në zonën më të gjelbëruar të kryeqytetit, do të thotë se ka diçka që nuk shkon. Bashkia ka diçka për të fshehur në këtë projekt.
Në nisje të punimeve është fakt se në atë pjesë të parkut janë prerë pemë. Nëse janë ato të sëmura siç thotë kryebashkiaku, atëherë një proces i tillë do të duhej të shtrihej në të gjithë sipërfaqen e liqenit dhe jo të priten vende-vende atje ku “rastësisht” bie të ndërtohet projekti i Veliajt për këndin e lojrave. Do të ishte mirë që qytetarët e Tiranës të informoheshin saktë e qartë nga Bashkia, se sa pemë do të priten dhe çfarë përfitojnë qytetarët nga kjo dhe a ia vlen të presësh pemë për të ndërtuar një kënd me lodra qoftë edhe nëse janë më shumë se dy lisharse e tre tavolina, siç është komentuar. Ka mjaft ambjente të tjera në kryeqytet ku mund të ndërtohet një park lojrash për fëmijë. Përse duhej pikërisht tek liqeni ku do të duhet të presësh pemë, ndaj dhe protesta e është e drejtë.
Ana tjetër e ngjarjes së djeshme është përplasja e policisë me mjeken protestuese. Nuk është e justifikuar aspak qytetarja që cënoi fizikisht policing, por aq më pak është i justifikuar polici që goditi me shpullë qytetaren. Kjo nuk është policia që duam, por këtu përgjegjësia nuk i bie Bashkisë, por Policisë dhe Saimir Tahirit.
