Nga Marjon Gorica
Ndonëse shpesh herë mediatikisht ministra të kabinetit Rama apo dhe vetë zotëria e tij dalin e thonë që në Shqipëri nuk ka fuqi punëtore apo profesionistë, atëherë gabohen. Gabohen dhe rëndë madje!
Si mund të thuash që nuk ka profesionistë në këtë vend? Si mund të thuash që kompanitë kërkojnë punonjës, por nuk ka. Vallë deri këtu kemi degraduar me “reklama të zeza”?
Jo more zotërinj nuk është aspak kështu! Këtu janë me mijëra njerëz që kërkojnë punë, kërkojnë një vend pune, nga i cili të nxjerrin mënyrën e jetesës . Kërkojnë punë që të ushqehen, të rrisin fëmijët, të paguajnë dritat dhe ujin e çdo detyrim tjetër qytetar.
Pra, nuk kërkojnë një punë, nga e cila të fitojnë vetëm paratë për të paguar dritat, ujin e taksat vendore.
Ato kompani që ju vizitoni përditë, madje duke u bërë reklama, duke i përmendur sa herë ju jepet mundësia, kur jeni në media, janë pikërisht këto kompani, të cilat mundohen të mashtrojnë ashtu si ju dhe mijëra qytetarë si në Shqipëri, por dhe ata të cilët i dëgjojnë kudo ndodhen.
I nderuar ministër i Mirëqënies, më vjen keq dhe që po kapem pas disa profesionesh, të cilat ju i keni përmendur, më vjen keq të përgojoj punën e denjë të shumë personave, por kam dëgjuar që Shqipëria nuk mbulon tregun me kasapë, elektricistë apo hidraulikë.
Nga këta ka plot, madje me dhjetëra persona. Një pjesë të tyre i kam kontaktuar vetë, kush të dojë i jap dhe fakte, madje jua mbledh e t’i takoni të gjithë së bashku. Janë persona në qendër të Tiranës, të papunë, të cilët prej vitesh nuk mund të kenë kryer sikur dhe 8 orë punë dhe kjo e dini përse ndodh? Ndodh, se askush nuk merr përsipër t’ua paguaj hakun si ju takon.
Të nderuar zotërinj, mund të punojë një kasap për 22,000 lekë në muaj? Mund të punojë një elektriçist për kaq të ardhura? Jo pra, është e pamundur. Askush nuk mund të punojë, por këtu duket interesi dhe shfrytëzimi që kërkojnë këto kompani “prestigjoze” në tregun shqiptar.
Përse janë hapur si kërpudha qendrat e “call center” nëpër Tiranë, Durrës e shumë qytete të tjera? Sepse kanë një treg tepër përfitues për këto kompani. Ju mendoni se atyre u interesojnë qytetarët tanë? Jo, por duke shfrytëzuar të rinjtë shqiptarë që punojnë pranë tyre ata kanë një kosto 4-5 herë më të vogël sesa mund të kenë në Itali apo kudo tjetër nëpër Europë, mos të them dhe më tepër.
120 lekë për orë paguhet një i ri sot nëpër këto qendra, maksimumi i punës që bëjnë arrin deri në 5 orë, e kjo me tepër sakrificë. Por për çfarë i dalin një studenti këto të ardhura?
Ja pra, ju lutem mos u merrni me intriga, na respektoni siç ju respektojmë. Të paktën dinjitetin njerëzor. Nëse doni klasë punëtore vlerësojini dhe jo t’i shfrytëzoni!
