Përmes një jurie të specializuar, Bashkia ka përzgjedhur produktet dhe suveniret e frymëzuara nga kryeqyteti të cilat do të përfaqësojnë Tiranën në sytë e vizitorëve dhe të turistëve.
Kryetari i Bashkisë së Tiranës Erion Veliaj shpërndau sot çmimet për fituesit e konkursit të organizuar me temë “Identifikimi, Dizenjimi dhe Përzgjedhja e Produkteve Turistike”.
Veliaj deklaroi se vetëm në gjashtë muajt e parë numri i turistëve që kanë vizituar kryeqytetin është rritur me 2.4 herë.
“Për ne turistët nuk janë një potpuri fotosh në instragram. Për ne turistët janë një mënyrë jetese. Tirana është një qendër financiare jo vetëm për Shqipërinë, por për shqiptarinë. Në thelb është një vend ku shërbehet. Ka një tregti të zhvilluar dhe besoj një nga burimet më të mira dhe më të sigurta në të ardhmen është turizmi. Vetëm në gjashtë muajt e parë është rritur 2.4 herë numri i turistëve që kanë vizituar Tiranën. Pra ende pa filluar vera, ende pa ardhur emigrantët që sjellin familjet dhe miqtë e tyre, 2.4 herë”, tha Veliaj.
Konkursi kishte për qëllimin identifikimin dhe përzgjedhjen e produkteve apo suvenire me synim rritjen e tregtueshmërisë dhe diversifikimin e tyre, duke lidhur dizenjimin dhe kompozimin me tendencat tregtare bashkëkohore si dhe me traditën dhe trashëgiminë natyrore, historike dhe kulturore të Tiranës.
