Presidenti i Komisionit Evropian, Jean-Claude Juncker, thotë se vizita e planifikuar e tij në Rusi ka për qëllim dialogun, dhe jo të sinjalizojë rishqyrtimin e sanksioneve të imponuara nga ana e Bashkimit Evropian.
Juncker e ka pranuar ftesën e Rusisë për të marrë pjesë në Forumin Ndërkombëtar Ekonomik në Shën Petersburg më 16 qershor, që do të jetë udhëtimi i parë në Rusi i një zyrtari të lartë të BE-së,qe kur Moska ka aneksuar Krimenë e Ukrainës, në vitin 2014.
Kjo vizitë vjen vetëm disa javë para se 28 vendet anëtare të BE-së duhet të vendosin nëse do t’i zgjasin sanksionet kundër Rusisë për shkak të agresionit të saj në Ukrainë.
“Ne nuk do të shohim zbutje të pozicioneve evropiane”, u tha Juncker gazetarëve në Luksemburg.
Ai ka shtuar se “ne do t’i vazhdojmë sanksionet kundër Rusisë dhe do ta bëjmë të qartë se ne në asnjë mënyrë nuk pajtohemi me aksionet e Rusisë në Ukrainë dhe Krime”.
