Kolë Gjoka, përfaqësues i Dhomës së Tregtisë e Industrisë së Tiranës dhe anëtar i kryesisë së Deutsch-Albanische Wirtschaftsgesellschaft dhe kandidat për deputet i CDU-së në Gjermani ka kryer një takim me Joseph Daul, Presidentin e Partive Popullore Europiane, ku është folur edhe për Çështjen Çame.
Ja njoftimi që ka bërë vetë Kolë Gjoka:
Takimi i sotëm me zotin Joseph Daul, Presidentin e Partive Popullore Europiane.
Si një mik i Shqipërisë, zoti Daul e njeh mirë historinë, por edhe klimën politike të Shqipërisë. Ai vlerëson maksimalisht reformat e ndërmarra në vitet e fundit nga Qeveria Shqiptare. Ai shpreson që ato të zbatohen në mënyrë rigoroze, dhe shpreh mbeshtetjen maksimale në këtë drejtim. Temat e bisedës rrotullohen, aty ku ka më shumë nevojë për një mendim europian.
A është zbehur vemendja e Bashkimit Europian për Ballkanin në këto kohë ciklonesh?
Momentalisht kjo pyetje ka ngelur pa një përgjigje të saktë. Gjithsesi, vëmendja dhe mbështetja ndaj Shqipërisë është e madhe. Shqipëria është faktori kryesor për stabilitet dhe i vetmi partner i besueshëm i BE dhe NATO në Ballkan.
Ndërhyrja dhe influenca ruse në Shqipëri nuk duhet neglizhuar. Kryeministri dhe agjencitë e sigurisë e kanë shtruar si temë kryesore dhe shpresoj që edhe partitë politike të distancohen nga “ndihmat” ruse.
A ka nevojë Shqipëria për një pozitë dhe opozitë më bashkëpunuese dhe si mund të nxisim këtë bashkëpunim? Zgjedhjet e lira dhe të ndershme janë baza e rikthimit të besimit midis palëve, pastaj fillon faza tjetër?
“Ne përkrahim dhe motivojmë çdo mundësi bashkëpunimi, për sa kohë është për të mirën e Shqipërisë dhe të ardhmen e saj europiane. Përkrahja e Partive Popullore Europiane për Shqipërin dhe të ardhmen e saj europiane nuk do të mungojë”, u shpreh zoti Daul.
Temë e bisedës ishte edhe Çështja Çame, marrëdhëniet shqiptaro-greke dhe influenca greke në rrugën tonë drejt Bashkimit Europian. Pjesë e këtij diskutimi u bënë edhe Eurodeputetët Reimer Böge, José Manuel Ferreira Fernandes, Richard Aschworth, Jan Olbrycht.
Kjo temë është pak e njohur në Parlamentin Europian. Ka nevojë imediate për lobing!
