Gjyqtarja e Shkallës së Parë në Tiranë, Regleta Panajoti, prej ditës së sotme nuk do të jetë më pjesë e trupës gjyqësore, për shkak se ajo ka dhënë dorëheqjen pranë Këshillit të Lartë Gjyqësor.
Këtë e konfirmojnë burime për gazetën Shqip, ku Panajoti ka marrë këtë vendim ditën e hënë (22 qershor).
“Për shkak të angazhimit tim në mësimdhënia dhe për t’i hapur rrugë brezit të ri të magjistratëve, jap dorëheqjen nga statusi i magjistrates (gjyqtares). Duke ju falenderuar për mirëkuptimin kërkoj që kërkesa ime të trajtohet në përputhje me ligjin.” – ishin këto fjalët që ka shkruar Panajoti, si motivacion për dorëheqjen.
Në fakt kjo dorëheqje nuk vjen për t’i hapur rrugë brezit të ri, por sepse Panajoti ka mësuar në mënyrë jo zyrtare, se do të eleminohej nga shkalla e dytë e Vettingu-t. Ditën e sotme, Kolegji i Posaçëm i Apelimit, pritet të shprehet me vendim.
Kjo dorëheqje përpara vendimit të KPA, e mbron përkohësisht gjyqtaren Panajoti me përballjen në SPAK. Në gjetjet e Vetting-ut, Panajoti kishte kursime të padeklaruara në cash dhe fitime të pajustifikuara, me vlerë 38 milionë lekë të vjetra. Nëse KPA e shkarkon Panajotin, atëhere mund të dërgojë më pas dosjen në SPAK dhe të nis sekuestrimi i pasurisë së pajustifikuar. Me dorëheqjen para vendimit të KPA, mund të shtyhet në kohë dërgimi i dosjes në SPAK.
Si u bë Regleta, “viktimë” e Frangajt?
Në 21 shkurt 2020, një gjyq me interes të madh financiar, po zhvillohej në Gjykatën e Tiranës, me gjyqtare Regleta Panajoti. Gjyqi kishte të bënte me aksionet e DIGITALB.
Pak javë para se të zhvillohej kjo seancë, aksionet e DIGITALB ishin tjetërsuar nga Aleksandër Frangaj dhe një grup biznesmenësh, në mënyrë të njëanshme. Skandali shkonte deri aty, sa zyra përmbarimore që kishte ekzekutuar kalimin e aksioneve, nuk kishte lënë hapësirë për ta ankimuar.
Pikërisht ky veprim i zyrës përmbarimore, u kërkua që të pezullohej në gjyqin me Regleta Panajotin, derisa aksionerët të zgjidhnin mosmarrëveshjen mes tyre.
Por gjyqtarja Panajoti vendosi konfirmimin e paligjshmërisë, duke bërë që Frangaj të hynte dhunshëm si aksioner në DIGITALB, në shkelje me marrëveshjen. Burime jozyrtare për gazetën Shqip bëjnë me dije se Panajoti për këtë shërbim të kryer, kishte marrë premtimin e Frangajt, se do të kalonte vettingun në shkallën e dytë, në KPA.
Në fakt, sot që flasim, Regleta po largohet nga sistemi i drejtësisë si një viktimë e Frangajt. Ajo ka dhënë dorëheqjen si gjyqtare, pasi ka mësuar se KPA do ta shkarkojë. Njësoj si Regleta, mund të digjen shumë gjyqtarë që marrin garanci nga Frangaj apo ndonjë biznesmen tjetër, se do të kalojnë Vetting-un. Sepse Frangaj nuk ka asnjë influencë në organet e Vetting-ut!
