Kreu i Grupit Parlamentar të Partisë Socialiste, Taulant Balla ka komentuar deklaratën e ish deputetit socialist Petro Koçi për Belinda Ballukun, të cilës iu referua si “themeluese të korrupsionit” në një koment të bërë pas aktivitetit të zhvilluar në Fier për 35-vjetorin e themelimi të PS-së.
Nga jashtë Kuvendit, Balla u pyet nga gazetarët edhe për komentet e Koçit ndaj ish zëvendës kryeministres dhe ish ministres nën akuzë nga SPAK, e cila aktualisht është drejtuese politike e PS në Fier, duke thënë me ironi se ditët janë të nxehta dhe temperaturat janë të larta.
“Unë nuk e kam ndjekur deklaratën e Petros dhe refuzoj të komentoj mbi diçka që nuk e kam lexuar vetë. Megjithatë, ditë të nxehta me temperaturë dhe secili ka këndvështrime të veta. Por mendoj se PS Fierin e ka kryeqytetin e vet. E kam drejtuar qarkun. Kemi fituar gjithmonë në Fier, dhe do të vazhdojmë të fitojmë”, tha Balla.
