Kryeministri Edi Rama po zhvillon ditën e sotme një takim me studentë dhe pedagogë në Universitetin Bujqësor të Tiranës, ku është kundërshtuar haptas nga një studente, e cila tha se përkundër çfarë flitet tarifat janë rritur.
“Mund të na e thoni ju zoti kryeministër se pse shpreheni që nuk janë rritur tarifat e studimit? Tarifat janë rritur. Unë jam studente e Financë-Kontabilitet dhe paguaj 320 mijë për tarifën. Ndërkohë dy kurset e tjera paguajnë 300-350. Pres përgjigje. Janë rritur apo jo tarifat?”, – tha studentja.
Më tej ajo u shpreh se do të braktiste këtë mbledhje, pasi nuk ishin njoftuar se do kishin një takim me Kryeministrin, duke lënë të kuptohet se studentët janë mbledhur, por pa u treguar arsyen, kjo si duket për shkak të frikës se nuk do të merrnin pjesë.
“Unë jam e para që do ta braktis këtë mbledhje, pasi nuk na ishte njoftuar se do të kishim takim me ju por me rektorin. Rektori po na gënjen se po na rrit tarifat Rektori po na gënjen dhe po na rrit tarifa. Kërkoj shpegim nga ju ose nga rektori. Po ashtu na kanë mashtruar sepse unë nuk e dija që ishit ju i ftuar sot, sepse nuk do vinim në takim me ju ashtu siç e kemi shprehur edhe në protestë që nuk jemi për dialog. Unë po lë mikrofonin dhe po e braktis këtë takim.”, – tha studentja, e cila u duartrokit nga kolegët në sallë.
Pas duartrokitjeve Kryeministri tha: “Çfarë ka për të duartrokitur këtu? Përdorni megafona kur unë jam i gatshëm që t’ju dëgjoj. Mirësjellja duhet të vazhdojë edhe në protestë”.
Nga ana tjetër, Kryeministri Edi Rama, u shpreh: “Nuk jeni të detyruar të rrini, nëse nuk doni të rrini, por një gjë po jua them, se nëse më ndihmon njeri që të gjejë në histori këtë që po bëni ju, unë do ju isha shumë mirënjoheës, pasi do kuptoja se nuk është hera e parë që studentë që ngrihen në protestë, kundërshtojnë, ftohen për dialog, por frikësohen të mbrojnë argumentet e tyre”.
