Nga Xhildinho Ozuni
Së fundmi, politika ekspansioniste greke dhe serbe i gëzohen faktit se mund të arrijnë të korrin diçka, në lidhje me prirjet e tyre nga idetë shoviniste për të zgjeruar territor, respektivisht platforma e ‘Greqisë së madhe’ e njohur si ‘Megali Idea’ dhe platforma e ‘Serbisë së madhe’ e njohur si ‘Naçertania’.
Programet politike ekspansioniste po ‘mbijnë’ dita-ditës, aty, ku ato e shohin të arsyeshme të ‘rriten’ dhe realizohen, pra në tokat e mbetura shqiptare, në territorin e Shqipërisë dhe të Kosovës.
Shovinizmi grek dhe serb po rifiton forcë, për shkak të gjendjes mjerane, në të cilën ndodhen Shqipëria dhe Kosova. Dy qeveritë shqiptare kanë treguar që janë antikombëtare, që luftojnë për interesat e partisë e jo të kombit dhe që i bëjnë lëshime skandaloze armiqve të përjetshëm, në këmbim të parave dhe, duke parë këto të meta, Greqia dhe Serbia kanë hedhur farën e përçarjes nëpërmejt diplomacisë false, pakicave minoritare për destabilizim si dhe asimilimit përmes fesë.
1. Duke i analizuar mirë, shteti grek ka arritur ta koordinojë mirë planin, për të aneksuar jugun e Shqipërisë. Arritja më e madhe, që korri kundrejt qeverisë Rama ishte marrëveshja e detit, nga ku, Greqia zgjerohet me 12 milje, si dhe ndërtimi i varrezave greke në territorin shqiptar. Kjo e fundit, padyshim, nesër do të shërbejë si kufi de facto për ‘Vorio-Epirin’.
Sipas disa mediave greke, disa parti ekstremiste po parashikojnë të hedhin në jugun e Shqipërisë, çeta të armatosura, të cilat do të provokojnë kryengritje dhe do të përgatisin truallin për aneksimin e këtyre territoreve nga Greqia. Në këtë ‘valle’ po merr pjesë partia neo-naziste e ‘Agimit të Artë’, si dhe organizata irredentiste greke ‘Omonia’, që vepron në Shqipëri, që po luajnë një rol kyç për të nxitur qarqe të caktuara shoviniste, të ndërveprojnë.
Qeveria shqiptare po i lejon tejmase strukturat irredentiste greke, që veprojnë në jug të Shqipërisë, të ngrejnë krye dhe të shfaqin idetë e tyre ekspansioniste.
2. Në lidhje me atë se çfarë po ndodh në Kosovë, krijohet bindja se Serbia ka mundur të ‘blejë’ presidentin aktual të Kosovës, Hashim Thaçin dhe po e detyron të heqë dorë nga zona e pasur e veriut të Kosovës, e cila ka shumicë popullate serbe.
Si po vendos Hashim Thaçi, fatin e Kosovës duke bërë tregti me serbët?
Kohët e fundit, presidenti i Kosovës Hashim Thaçi është shprehur për shkëmbim territoresh e korrigjim kufiri me Serbinë. Ai është i mendimit, që veriu i Kosovës, saktësisht Mitrovica Veriore ti kalojë Serbisë dhe në këmbim, Kosova merr Luginën e Preshevës.
Kush mund t’i besojë këta zotat e politikës, se do të bëjnë gjëra kaq të mëdha, siç është korrigjimi i kufirit me Serbinë, pa humbur Kosova asnjë pëllëmbë tokë, kur ata që sot e njëzet vjet nuk janë në gjendje ta detyrojnë Serbinë të zbulojë varrezat masive dhe t’i kthejë eshtrat e të pagjeturve?
Derisa këta hijena të politikës dhe frymëzuesit e tyre krijojnë ëndrra ose gënjejnë në mënyën më të paskrupullt për marrëveshje historike me Serbinë, është po kjo Serbi që nderon, i lutet, i bën respekt dhe koncesione secilit shtet që nuk e njeh ose e tërheq njohjen e Kosovës.
Qytetarët e Kosovës e dinë fare mirë se liderët e saj politikë të të gjithë krahëve dhe ngjyrave janë të varur nga sponsorë, të cilët ditën shesin patriotizëm për Kosovën, kurse natën bëjnë tregti dhe kontrabandë me Serbinë. Pra, Kosova, në këto rrethana nuk mundet kurrsesi të ketë një palë negociuese, e cila me të vërtetë lufton për interesat e Kosovës kur realisht lufta bëhet për pushtet, prestigj të rrejshëm, për përfitime politike, për përfitime materiale etj.
Nga krahu tjetër pastaj, Shqipëria nuk është se do të bëjë përpjekje për ta ndalur ndarjen e Kosovës, përkundrazi do të jetë gati për të prerë shiritin e lamtumirës. Partitë politike si e socialistëve por edhe e demokratëve janë njësoj, nga çfardolloj aspekti. Atë që bënë demokratët dje, po e bëjnë socialistët sot. Si mund t’i besohet kësaj Shqipërie, se do të qëndrojë e paepur në mbrojtje të interesave të Kosovës, kur po kjo Shqipëri, për interesa aq meskine helmon popullin e vet me miell për kafshët që importon nga Serbia dhe që një ditë vë kufij e ditën tjetër heq kufij me Kosovën, që një ditë vë dogana e ditën tjetër heq dogana, kur as patatet e Kosovës nuk i lejon të hyjnë në tregun e saj?!
Ajo çka përflitet për bashkim kombëtar është thjesht një propagandë, që u serviret popullit shqiptar në të dyja shtetet dhe që ‘gatuhet’ në ‘kuzhinat e Serbisë dhe Greqisë’, me qëllim, krijimin e një tymnaje për të destabilizuar shqiptarët në përgjithësi.
‘Viti i Skënderbeut’ pritet të kurorëzohet si viti i tradhëtive të mëdha, ku ithtarët e ‘Megali Idesë’ dhe ‘Naçertanias’, në këtë rast, Edi Rama dhe Hashim Thaçi po kërkojnë të hyjnë në histori me njolla të zeza, në dëm të kombit shqiptar.
