Eshtë inxhinier, mbrojtës, por edhe ka shënuar gola të rëndësishëm. Asnjë nga këto nuk ka lidhje logjike me njëra-tjetrën, por i ka bërë bashkë Ylli Shameti, futbollisti gjirokastrit i Kukësit. Pra nuk ka mbaruar shkollën e preferuar për njerëzit e topit, por ka pasur pasion shkencat ekzakte, ndërsa për të arritur majat në futboll ka pritur me durim shansin e tij. Ndërsa tani është një nga futbollistët më të rëndësishëm të këtij Kukësi që kërkon trofeun e parë, pasi pjesmarrja në Europa League i është kthyer në rutinë. Ishte Shameti që i dha një dorë skuadrës verilindore, për të arritur për të dytin vit me rradhë finalen e Kupës së Shqipërisë, si dhe ishte po ai që me golin e shënuar dje ndaloi Skënderbeun në “Zeqir Ymeri”… kështu që festa është e gjitha për të.
